✍️ د.ئاوێسا ره‌زایی
ئەڕایچە پیشەوا قازی لە ناو وەسیتنامەگەی زیادتر لە چەنجار نۊساس: بێسەوادی و حەسۊدی لە چەک هەم خەتەرناکترە؟
■ مللەت کورد، مناڵە عەزیزەگانم، خوەیشکەیل و براگانم کە مافەگاندان لە لێدان دەریخ بیە و زوڵم و تەجاوز وە پیدان کریاس، لە ئاخر دەقەییل زنە بۊنم چەن پەن و ئامۆژیاریگ ئەڕادان دیرم.
وە خاتر خودا دەس لە ڕق و کینە و دژمنی و حەسۊیی ئەڵگرن.
یەکبگرنەوە و و پاڵپشت یەکتر بون،
لە وەرایوەر ستەمکار و زلهێز هەڵسن و ئستوار بون.
وە بەڵاش خوەدان وە دژمن نەفرۆشن .
دوشمن، تا وەختی هەوەجە وە پیت دیری و خوەشی لە لیت تیەی ک وە دەس تنەو وە هەدەفەیل خوەی بڕەسی.
دوشمن ڕەحم و بەزەیی وە ت نیەتی،
دوشمنەیل مللەت کورد فرە دەڕەندە و بێ ڕەحمن .
یەکەوگرتن ،یەکڕیزی و پشتیوانی لە یەکتر ،رەمز سەرکەفتن گێشت نەتەوەیەگە، گەرنە ئەو نەتەوە لەناو چوود و وێران بوود لەژێر دەس و ئەسیر دوشمن بوود.
ئیوە مللەت کورد هۊچ کەم نەیرین لە نەتەووگانتر دونیا.
پیاوەتی وخیرەت و لەیاقەت ئیوە فرە گەورەترە لەو گەلەیلەسە کە لەلای دوشمنەیلیان وە دیل گریاۊن و ئازاد کریانە.
. ئەوانەی ک خوەیان ئازاد کردنە ، ئتحاد و یەکپارچەیی خوەیان نیشان دانە.
ئیوەش جوور ئەوانە سەرشووڕ و زەلیل و زەبوون نەون. خوەدان وە دوشمن نەفرۆشن.
حەسۊیی وە یەک نەکەن.
وەی شێوە تۊەنین ڕزگاری وەدەس بارین.
براگانم وە دوشمن نەخەڵەتیەین .
دوشمن کورد چ ڕەںگ و نەتەوە و ڕەگەزێگ بوو ، بێ وژدان و بێ ڕەحمە لە وەرایوەرت ،و خود کوردئەڕای لەناوبردن کوردەیل تر ،وەکار تیێەری.
دشمەن ئیوە حەسۊدەو وە فێت و فەن هاندان دەی کە دژ وە یەک بوسین و یەکتر بکوشین.
یانە بەشیگ لە وەسیەتنامەی پیشەوا قازی محەمەد وەر لە قبووڵ کردن حوکم قەنارە بی.
پیشەوای نەمر لە شوونیگ تر لەی ژاننامە نۊساس:
●ئەڕای خاتر خودا باوەڕ وە قەسەم و قوران دشمەن نەکەین چۆنکە فەن کەن وەگرددان و فەریودان دەن.
●من یانە گێشتی دیمەو وەی خاترە وە دوشمن باوەڕ نیەکەم..
●ئامۆژیاریمان کردیە حەسۊد نەۊمن وە داشتەو دارایی و سەرکەفتن یەکتر چۆنکە کوردسان هێن گێشتمانە و بەش گشتمان کەید و جی ئەڕای گێشتمان دیری.
●لە بار سیاسی ، ئابووری، گیانی و نامووسی خەیانەت وە یەک نەکەن.
●زانست خوەدان فرەتر بکەین تا فەریو دشمەن نەخوەین.
●تاوەختیگ یەکەو نەگرین ، ڕزگاری وەدەس نیەتی.
کەمیگ وەگەرد یەک بچیمەو ئەڕای وەختێگ ک پیشەوا خەریک نۊسان ئێ ژاننامە بیە!
وەڕاسی لە گێشت ئەو ساڵەیلە چە دۊی؟چە شنەفتۊ؟ چە تەجروبە کردۊ کە ئەقەرە وە دڵ شکیایگەو ئاڕامان نۊساس.
یا شایەد خاسترە بپرسم: ئایا زانستیە چ قەیران و خسرانێگ ها ناومان و لە شوون خوەی و خوەی مانان قەرارە بۊمنە ویلکانە بەنیلکەی دەس دوشمن و وەی نزیک و زۊە یەکەو نەگریم.
٧٩ ساڵ کەم نیە. پیشەوا خوەی تەناف خستە مل خوەی تا ئەو تەنافە نەودەمایەی خنکیان هەناس کوردسان.
هەرچی هۊر کەم و نۊسم، زیاتر هەست وە ئاخ بێکەسی پیشەوا لە ئاخر نوختەی وەسیەتنامەگەی کەم.